A FESTA DA MALLA

 O presidente da Asociación de Amigos da Malla de Meira, Manolo Pardo, e dous membros máis da mesma, Manolo Ferreiro e José Folgueira, Perán, viñeron conversar co alumnado de 3.º e 4.º de ESO para darlles a coñecer o seu labor de divulgación dos traballos tradicionais que leva consigo o proceso de elaboración do pan, dende a sementeira do cereal ata a malla propiamente dita. 

O encontro celebrouse na bilioteca do centro, que se encheu de malles, aixadas, forquitas e outros apeiros utilizados tradicionalmente para levar a cabo estas tarefas, e que eles trouxeron para ilustrar as súas explicacións.

Agradecemos enormemente a súa visita, que nos achegou a realidade do mundo rural meirego, descoñecido por unha parte importante de nós.

 

O AGASALLO DE ANYA E SABELA

 O alumnado de 1.º de ESO pertencente ó club de lectura puido gozar dun encontro coa autora do libro que leron este trimestre.

Sabela Núñez Singala veu ó centro acompañada dos monicreques creados para a representación da adaptación da súa obra O agasallo de Anya, que constituíu o eixo da conversa en torno á realidade de Xiana, galega, e Anya, ucraína, as protagonistas da obra. Dúas nenas de once anos entre as que media unha gran distancia xeográfica, pero moita menos a nivel de sentimentos. de soños, de ilusións.

EN TORNO Á SEGA E Á MALLA

 Segadores da Órrea en terras de Castela. Unha historia de heroes. Este é o título do documental que puidemos ver onte na biblioteca da man de Carlos Veiga e Paco Veiga, que viñeron acompañados de catro destes segadores en Castela, catro nenos que foron no seu día, catro picariños que se desprazaron a Castela para atar os mollos de cereal e que onte nolo viñeron contar ó instituto para deixar constancia do seu traballo, para  que tomásemos consciencia das dificultades da vida nunha época non moi remota. En fin, para  que non esquezamos quen somos e de onde vimos.

A eles, a través de Manolo do Valente, a Cándido do Burón, a Tino do Conde e a Manolo do Maruxo, que nos acompañaron nesta mañá, queremos renderlles a nosa humilde, pero sentida homenaxe.

Nas seguintes imaxes podemos ver o calzado que usaban e tamén  a zoqueta que utilizaban os segadores para protexerse de posibles cortes co fouciño.

Día do Libro

 Como parte da conmemoración do Día -ou Semana- do Libro, contamos coa visita da escritora María López Sández, que, nun encontro co alumnado de 4.º de ESO, contounos os detalles da elaboración, coa colaboración de Mª Isabel Fraga Vila e Miguel Fraga Vila, do Herbario de Rosalía, unha obra que recolle as principais especies vexetais presentes na obra da nosa poeta máis sobranceira.

Día de Rosalía

 Xosé Otero Canto, Alfonso Blanco, Anxo Grande, o grupo musical Son Galego e o noso alumnado converteron o Día de Rosalía nunha data especial na que, ademais de festexar a nosa poeta máis senlleira, reivindicamos a lingua materna de todas as nosas alumnas e alumnos.

Catro alumnas de 3.º exerceron de xornalistas para entrevistar os convidados ó acto.

Xosé Otero Canto presentounos o seu libro Romanceiro do Pedregal. Lendas do Pedregal de Irimia, acompañado polo fundador de Xermolos -que participou na edición-, Alfonso Blanco  e polo seu ilustrador, Anxo Grande que, á súa vez, veu acompañdo do resto de membros do grupo Son Galego, que puxeron a parte musical á celebración. 

Ademais, o EDLG elaborou un vídeo coa recitación dun poema de Rosalía de Castro. Escoitar  "Adiós ríos, adiós fontes" de Rosalía de Castro en boca do alumnado do centro nas súas diferentes linguas maternas supuxo un momento especialmente emotivo.

Pinchando aquí podedes acceder ó vídeo

IV CERTAME FOTOGRÁFICO DO IES PEDREDAL DE IRIMIA

 Un ano máis, o IES Pedregal de Irimia convoca o seu certame fotográfico, centrando esta vez a temática en torno á meteoroloxía e a paisaxe.

Inclúense as bases e calquera dúbida ou aclaración poderase enviar a través do correo electrónico desta biblioteca.

 biblioteca escolar.

VII CERTAME DE DEBUXO E POESÍA AVELINO DÍAZ

 Un ano máis, a Asociación Cultura Avelino Díaz, o Concello de Meira e o Concello de Riotorto convocan o Certame de Debuxo e Poesía Avelino Díaz, no contexto da reivindicación dun Día das Letras Galegas para o escritor meirego.

AS ALUMNAS

 Os membros do club de lectura de adultos (nais, pais e persoal docente e non docente do instituto) reuníronse para comentar a peza As alumnas, de Paula Carballeira, galardoada co Nacional de Literatura Dramática 2023.

Animada e interesante charla acompañada de doces sobremesas e bo café que nos axudaron a pasar unha tarde proveitosa e entretida.

UN CLÁSICO DO OUTONO: A EXPOSICIÓN DE COGUMELOS.

 VI Exposición micolóxica do IES Pedregal de Irimia

O martes, día 7, e o mércores, día 8, de novembro permanecerá aberta a VI Exposición micolóxica do IES Pedregal de Irimia. A exposición realizada na biblioteca do centro contou este ano con máis de cento sesenta exemplares de corenta especies distintas de cogomelos recollidos na contorna e perfectamente identificados con cadansúa ficha.

De novo a exposición foi froito da colaboración coa Sociedade Micolóxica Lucus e as achegas de cogomelos de profesorado e alumnado do centro.

A exposición contou como información complementaria con:

• Unha colección de utensilios básicos dun/ha micólogo/a.

• Libros, revistas e lexislación micolóxica.

• Presentación cos conceptos básicos de micoloxía e as fichas ilustradas dos cogomelos máis comúns da contorna.

Como no curso anterior, a exposición abriuse ao público xeral durante as mañás do martes e mércores, asistindo numerosas familias así como os residentes do Centro de Atención de Maiores de Meira.

FELIZ COMEZO, LECTORAS!

 Deu comezo o curso e, un ano máis botamos a andar cos clubs de lectura no Pedregal de Irimia.

Para facelo, o grupo de alumnado, aproveitando a escolla do libro Sentido y sensibilidad, celebrou unha "tea party" con té, pastas e moita elegancia británica.