SEMANA DA PRENSA

 Para conmemorar a Semana da Prensa, a biblioteca amosounos unha exposición que recolle os vinte e sete Latexos do IES Pedregal de Irimia, vinte e sete anos da publicación escolar na que queda plasmada a actividade xornalística da comunidade educativa.

Pero houbo máis. A maiores da prensa actual, a biblioteca tamén nos ofreceu unha exposición coas portadas dos acontecementos máis importantes do século XX, por xentileza da nosa compañeira Elisa.

III CERTAME FOTOGRÁFICO DO IES PEDREGAL DE IRIMIA

 Xa está convocado o III Certame Fotográfico do IES Pedregal de Irimia. Neste ano do cuadraxésimo aniversario do centro, esperamos máis participación ca nunca. Aquí quedan as bases.

VI CERTAME DE DEBUXO E POESÍA AVELINO DÍAZ

Un ano máis, os Concellos de Meira e Riotorto en colaboración coa Asociación cultural Avelino Díaz cconvocan o certame de debuxo e poesía Avelino Díaz co obxectivo de reivindicar a figura do poeta e dar a coñecer a súa obra.

Para saber máis, deixámosvos as bases e estamos á vosa disposiciión na biblioteca do centro.

V Exposición micolóxica do IES Pedregal de Irimia

 

O martes, día 8, e o mércores, día 9, de novembro permanecerá aberta a V exposición micolóxica do IES Pedregal de Irimia. A exposición realizada na biblioteca do centro contou este ano con máis de 200 exemplares de 55 especies distintas de cogomelos recollidos na contorna e perfectamente identificados con cadansúa ficha.

De novo a exposición foi froito da colaboración coa Sociedade Micolóxica Lucus e as achegas de cogomelos de profesorado e alumnado (23) do centro.

A exposición contou como información complementaria con:

• Unha colección de utensilios básicos dun/ha micólogo/a.
• Libros, revistas e lexislación micolóxica.
• Presentación cos conceptos básicos de micoloxía e as fichas ilustradas dos cogomelos máis comúns da contorna.
• Paneis informativos dos hábitats dos cogomelos (cedidos temporalmente pola S.M. Lucus)

Como novidade, este ano a exposición abriuse ao público durante a mañá do martes, día 8, asistindo numerosas familias así como os residentes do Centro de Atención de Maiores de Meira.

EXPOSICIÓN MICOLÓXICA

Un ano máis, xa está na biblioteca a exposición de cogomelos que, coma sempre, nútrese das achegas de todas e todos vós.

DÍA DAS BIBLIOTECAS ESCOLARES

 

CLUB DE LECTURA

 Os Ratos de Biblioteca están xa metidos en fariña (bibliográfica, se entende).

E para eles acaban de chegar, recén saidiños do forno, os exemplares do libro que elixiron para este primeiro trimestre.

II CERTAME DE DECORACIÓN DE SAMAÍN

 Un ano máis, a Biblioteca convoca o Certame de decoración das aulas con motivo da celebración do Samaín. 

As bases figuran a continuación.

DE VOLTA!

 Despois do parón do verán e duns días extra para poñerse ó día, aquí está de novo a biblioteca escolar aberta para todas e todos vós, retomando actividades anteriores e propoñendo outras novas ou que deixaron de realizarse durante estes anos de pandemia.

Atrevédevos a asomarvos. Esperámosvos.

ENCONTRO INTERXERACIONAL

O venres pasado, no IES Pedregal de Irimia produciuse un deses momentos máxicos que ás veces xorde no noso camiño. Recibimos a visita das persoas usuarias do Centro de Atención a Maiores de Meira, despois de que unha parte do alumnado, acompañado da profesora de Relixión e do profesor de Valores Éticos, visitase o CAM e intercambiase impresións cos residentes

Foi un momento máxico porque, aínda que debería ser absolutamente normal, non é moi frecuente esta confraternización entre persoas de idades tan distintas, a pesar do moito que se podería aprender dela. Agrádanos inmensamente o contacto entre xeracións distintas, criadas e educadas en momentos e condicións tan diferentes.

Coñeceron o centro, escoitaron poemas, visitaron a bilioteca e foron incluídas na lista de socias da mesma, da cal esperamos que fagan moito e moi longo uso.

MOITAS GRAZAS POR VISITARNOS!